Anandarangam pillai - A Diary blossomed into Historical Document

ஒரு நாட்குறிப்பு வரலாற்று ஆவணமானது.

ஆனந்தரங்கம் பிள்ளை 1709 ஆம் ஆண்டு சென்னையிலுள்ள பெரம்பூரில் பிறந்தவர். இளம்வயதில் தந்தையின் வணிகத்திற்குத் துணையாக நின்றவர். பன்மொழிப்புலமை பெற்ற இவர், ஃப்ரெஞ்சு கவர்னராக விளங்கிய துய்ப்ளேவிடம் துபாஷியாகப் (மொழி பெயர்ப்பாளராகப்) பணியாற்றியவர். ஆனந்தரங்கப்பிள்ளை ஆட்சியாளர்களின் முடிவெடுக்கும் கொள்கைகளுக்கும் துணைநின்றவர்.  ஃப்ரெஞ்சு ஆட்சிக்கும் இந்திய மக்களுக்கும் இடையே பாலமாகத் திகழ்ந்தவர். 1736 ஆம் ஆண்டிலிருந்து அவர் இறந்த நாளான 1761 ஆம் ஆண்டு ஜனவரி 11 ஆம்நாள்வரை குறிப்பு எழுதினார். இருபத்தைந்து ஆண்டுகள் எழுதிய அக்குறிப்பே “ஆனந்தரங்கப்பிள்ளை டைரி” எனக் குறிப்பிடப்படுகிறது. ஆனந்தரங்கம் பிள்ளை தன் நாட்குறிப்பேட்டைப் விளம்பரப்படுத்தவில்லை. சரியாகப் பாதுகாக்கவும் இல்லை. எனவே அவர் இறந்தபின் அவருடைய குறிப்புகள் செல்லரித்து இருந்தன.  எண்பதைந்து ஆண்டுகளுக்குப் பிறகு 1846 ஆம் ஆண்டு வருவாய் இலாகா தலைவராக இருந்த அர்மான்ட் கால்ஸ் என்பவர் நகல் எடுத்துப் பாதுகாத்தார். 1892 ஆம் ஆண்டு சென்னை ஆவணச்சேவைகள் அமைப்பு கால்ஸின் நகலிலிருந்து நகல் எடுத்துக்கொண்டது. இவ்வாறு படிப்படியாக நகலெடுக்கப்பட்டு இன்று நல்ல வரலாற்று ஆவணமாக அச்சிடப்பட்டிருக்கிறது.

“ஆனந்தரங்கப்பிள்ளை தன்னுடைய காலத்திய நாகரிகத்தின், கலாசாரத்தின், பழக்க வழக்கங்களின் வரலாற்றை எழுதி உள்ளார். இந்திய ஐரோப்பிய வியாபாரிகள், காலனிவாதிகள், தளபதிகள், போர் வீர்ர்கள், இந்திய மன்னர்கள், குடியானவர்கள், கைவினைஞர்கள் ஆகியோரை அவர் கூர்ந்து கவனித்து வந்துள்ளார். ஐரோப்பிய சமுதாயத்தின் புதிய சிந்தனைகளையும் இயந்திரங்களையும் ஆசிய நாடுகளில் புகுத்துகின்ற சரித்திரக் கடமையை ஆற்றிய புதிய காலனி ஆதிக்க அரசு உருவாக்கத்தையும், முகலாய சாம்ராஜ்யத்தின் சிதறும் போக்கினையும் அவர் விவரித்துள்ளார். சதிகள், போர் விவரங்களையும், சமூக, அரசியல் எண்ணங்களையும் மதநம்பிக்கைகளையும் அவருடைய நாட்குறிப்பேட்டில் காணலாம்” என ”ஆனந்தரங்கப்பிள்ளை வாழ்க்கையும் நாட்குறிப்பும்” என்னும் நூலில் டாக்டர். என். ரங்கநாதன் குறிப்பிடுகிறார். ”உரைநடையில் முதற்பெரும் தமிழ் நூல், இன்றுவரையும் கூட நம் மொழியில் நீண்ட உரைநடை நூல் பிள்ளையின் நாட்குறிப்பே” என ஆனந்தரங்கப் பிள்ளை கால அரசியலும் சமுதாயமும்” என்னும் நூலின் ஆசிரியர் இர. ஆலால சுந்தரம் குறிப்பிடுகிறார். நாட்டுப்பற்றும் மொழிப்பற்றும் மிக்க பிரெஞ்சு நாட்டுப் பாரீஸ்டர் பட்டம் பெற்ற புதுவை ஞானதியாகு அவர்கள் ”ஆனந்தரங்கம் பிள்ளை தினசரி, சிறுகதைக் கொத்து அல்ல, சரித்திர நூலுமல்ல. அன்றாடம் பார்த்ததையும், கேட்டதையும் குறைக்காமலும் மிகைப்படுத்தாமலும் கற்பனா சக்தியை உபயோகிக்காமலும், உள்ளதை உள்ளபடியும் அவருக்குத் தோன்றியவாறும் அவர் அதில் குறிப்பிட்டிருக்கிறார்” எனக் கூறியுள்ளார்.

**************

காலத்தின் கொடையாக வந்த கலாம் - APJ Abdul Kalam is Times Gift 

இமைக்க மறுக்கும் இமைகளால் விழிக்கென்ன பயன்

சுமக்க மறக்கும் விழுதுகளால் மரத்திற்கென்ன பயன்

நல்லோரை மறந்தால் நானிலம் வாழ்வதெப்படி ?

விண்ணுக்கு விண்கலம் செலுத்தியதைவிட

முடங்கிய கால்கள் நடக்க கருவி செய்ததே பெரிதென்றாரே

நாட்டின் முதல் குடிமகனாம் குடியரசுத்தலைவரைப்

பாடநூல்களில் மட்டும் தானே பார்க்கமுடியும் என்னும் எண்ணம்

பள்ளிகளுக்கு அவர் வந்தபோதுதான் ஓடி ஒளிந்துக்கொண்டதே

நீங்கள் தங்கியபோது ராஜ்பவனமே

எந்த உயிரும். கொல்லப்படாத சைவ (சரவண) பவனமானதே.

நீங்கள் சேர்த்துவைத்த சொத்து மக்களின் அன்பன்றி வேறில்லை

உறங்கவிடாத கனவுகாண் எனக்கூறி உயர்த்திய நல்லுள்ளம் வேறில்லை

காலம் தன்னைக் குறுக்கிக்கொண்டது கலாமாக

அதனால் தான் வாழ்ந்த காலமெல்லாம் பாடம் சொல்லிக்கொண்டிருந்தார்

மூன்றெழுத்தில் மூச்சிருக்கும் ஆம்

அந்தக் கலாம் என்னும் மூன்றெழுத்தில்தான்

உழைப்பின் மூச்சிருந்தது. உண்மையின் மூச்சிருந்தது

எளிமையின் மூச்சிருந்தது. ஏற்றத்தின் மூச்சிருந்தது

கலாமா  ! மறக்கலாமா ?. நம் கலாமை மறக்கலாமா ?

அமைதி உடனிருப்பு நோக்கில் திருக்குறளில் குணநலனும் சமூக நலனும் Nobility and Social welfare in Thirukkural for a Peaceful co-existence

^{அமைதி உடனிருப்பு நோக்கில் திருக்குறளில் குணநலனும் சமூக நலனும்}

Nobility and Social welfare in Thirukkural for a Peaceful co-existence

தெய்வப்புலவர் திருவள்ளுவர் அருளிய திருக்குறள், மானுட வாழ்விற்கும் மானுடமேன்மைக்கும் (HUMAN RESOURCE DEVELOPMENT) நெறி காட்டிய ; காட்டுகின்ற ; காட்டும் நூல். காலந்தோறும் மக்களின் வாழ்வைச் செம்மைப்படுத்துவதில் இடையறாத பங்கினை ஆற்றிவரும் அரிய இலக்கியமாகத் திருக்குறள் திகழ்கிறது. இன, மொழி, நிற வேறுபாடின்றி அனைவரும் ஏற்றுக்கொள்ளும் ஒரே இலக்கியமாகத் (SECULAR LITERATURE) திகழும் பெருமையுடையதும் இத்திருக்குறளே. அமைதிக்கும் உடனிருப்புக்குமான வழி வகைகளைச் செய்யும் இலக்கியமாகத் திருக்குறள் திகழ்வதனை, குணநலன்களையும் சமூக நலன்களையும் எடுத்துரைக்கும் திருக்குறள்களின் வழி நிறுவுவதே இக்கட்டுரையின் நோக்கமாகிறது. (ESTABLISHING THIRUKKURAL IS THE DIDACTIC LITERATURE FOR PEACEFUL CO-EXISTENCE THROUGH ITS NOBILITY AND SOCIAL WELFARE COUPLETS)

குடிமைப்பணிக்கு அறமே முதல் (VIRTUE IS THE MILE STONE FOR CIVIL SERVICE)

திருக்குறள் அறத்தை அற வழியில் செய்ய வலியுறுத்தும் நூல் ; பொருளை அற வழியில் சேர்க்க அறிவுறுத்தும் நூல் ; காமத்தை அற வழியில் அடக்க நெறிப்படுத்தும் நூல். அறம், பொருள், இன்பம் என ஒவ்வொன்றிற்கும் இலக்கணம் வகுக்கக்கூடிய நூலாகத் திருக்குறள் இருப்பதனை உணர்ந்துகொள்ளமுடிகிறது. உலக அமைதிக்கு அடிப்படை அறச் சமன்பாடே. அறச்செயல்களேயாயினும் அறத்தினின்று வழுவி செய்தல் கூடாதென்பதனை

ஈன்றாள் பசிகாண்பாள் ஆயினும் செய்யற்க

சான்றோர் பழிக்கும் வினை  (தி. 656)

THOUGH SHE WHO BEGOT THEE HUNGERS

SHUN ACTS DENOUNCED BE ANCIENT SEERS

எனக்கூறி அறவழியில் மட்டுமே அறத்தை மேற்கொள்ளவேண்டும் என்றும் தீயவழியில் நின்று அறம்செய்தல் கூடாதென்பதனையும் தெளிவுறுத்துகிறார். நற்குணம் கொண்டோர் ஒருவருடைய அடிப்படைத் தேவைக்கு மிஞ்சி எதைச் சேர்ப்பினும் அதனைத் தீயபொருளாகவே எண்ணுவர்.  சமூக நலன் கொண்டு பின்பற்றப்படும் அத்தகைய எண்ணம் கொண்ட குடிமைப்பணியே பெருமையுடையது என்பதனை

அருளொடும் அன்பொடும் வாராப்பொருள் ஆக்கம்

புல்லார் புரள விடல்           (தி. 755)

RICHES DEVOID OF LOVE AND GRACE

OFF WITH IT; IT IS DISGRACE

                                                                                  

என்னும் திருக்குறளின்வழி உணர்த்துகிறார் தெய்வப்புலவர்.  பிறரை வருத்திப் பெறும் செல்வத்தை வெறுத்தாலே சமூகம் சீரடையும் ; உலகம் நலம்பெறும் ; அமைதி இயல்பாகும் எனத் தெய்வப்புலவர் தெளிவுறுத்துகிறார்.

பசி நீக்கும் மருத்துவம் (HUNGER TREATMENT)

        பசிப்பிணி மருத்துவர்களாக விளங்கும் மக்களாலேயே இவ்வுலகம் வாழ்கிறது என்கிறார் தெய்வப்புலவர். அத்தகையோர் துறவிகளைக் காட்டிலும் மேம்பட்டவர்கள் என்பதனை

       

ஆற்றுவார் ஆற்றல் பசிஆற்றல் அப்பசியை

        மாற்றுவார் ஆற்றலின் பின் (தி.225)

        HIGHER’S POWER WHICH HUNGER CURES

        THAN THAT OF PENANCE WHICH ENDURES

என்னும் திருக்குறள் எடுத்துக்காட்டுகிறது. பசியை நீக்கி வாழும் எண்ணமே உடனிருப்புக்கான அடிப்படையாகவும் உலக அமைதிக்கான வழியாகவும் அமையும் என்பதனைத் தெளிவுறுத்துகிறது.

பெருமிதமான வாழ்வு (PROUD LIFE)

       

வாழ்க்கை என்பது வாழ் + கை எனப் பிரிக்கத்தக்கதாக அமைகிறது. கை என்பது சிறிய என்னும் பொருளையும் ; வாழ் என்பது இவ்வுலகத்தில் உயிருடன் வாழ்தலையும் குறிக்கிறது. உயிர்வாழும் காலம் குறுகியது என்பதனை உணர்த்தும் வகையிலேயே இச்சொல் பின்னப்பட்டிருப்பதனை உணரமுடிகிறது. இதனைச் செப்பமாக உணர்ந்தாலே அனைத்து உயிர்களையும் அரவணைத்துவாழும் பொதுமைப்பண்புடன் உலக அமைதிக்காகவும் சமூக நலனுக்காகவும் வாழக்கூடிய நிலை ஏற்படும். அவ்வாறு வாழ்வோரையே உலகம் போற்றும் என்பதனை

குற்றம் இலனாய்க் குடிசெய்து வாழ்வானைச்

சுற்றமாச் சுற்றும் உலகு (தி. 1024)

WHO KEEPS HIS HOUSE WITHOUT A BLAME

PEOPLE AROUND, HIS KINSHIP CLAIM

என்னும் திருக்குறளின் வழி உணர்ந்துகொள்ளமுடிகிறது. நல்லோர் எப்பொழுதும் பலர் சூழ வாழ்வர் என்பதனையும் உணர்த்தியுள்ளார் தெய்வப்புலவர் திருவள்ளுவர்.

தெய்வம் துணை நிற்கும் (GOD FOR A SOCIAL WORKER)

தான் பெற்ற குழந்தையைக் காக்கும் கடமை தாய்க்குரியதாக அமைவதைப் போலவே இவ்வுலக உயிர்களைக் காக்கும் கடமை இவ்வுலகைப் படைத்த தெய்வத்திற்கே உரியது எனத் தெளியமுடிகிறது. தான் செய்ய வேண்டிய பணியினை எவரேனும் செய்வாராயின் அத்தெய்வம் மகிழ்ந்து அத்தகையோர்க்குத் துணை நிற்கும் என்பதனை

குடிசெய்வல் என்னும் ஒருவற்குத் தெய்வம்

மடிதற்றுத் தான்முந் துறும்             (தி. 1023)

WHEN ONE RESOLVES TO RAISE HIS RACE

LOIN GIRT UP GOD LEADS HIS WAYS

என்னும் திருக்குறள் உணர்த்தி நிற்கின்றது. இத்திருக்குறளை ஒரு குடும்பத்தின் முன்னேற்றத்திற்கு ; ஒரு இனத்தின் முன்னேற்றத்திற்கு ; ஒரு நாட்டின் முன்னேற்றத்திற்கு உழைக்கும் ஒருவர் என எவ்வகையிலும் பொருள்கொள்ளமுடிகிறது.

அமைச்சின் அருமை (MINISTRY OF EXCELLENCE)

        வீட்டின் நிர்வாகத் திறன் நாட்டு வளத்தையும், நாட்டின் நிர்வாகம் உலக வளத்தையும் மேம்படுத்தும் வகையில் அமைதல் வேண்டும். உலகின் அமைதியே ஒவ்வொரு நாட்டிலும் எதிரொளிக்கும் என்பதனை உணர்ந்து உடனிருப்புக்கான வழிவகைகளை செய்தல் வேண்டும். அவ்வாறு சமூக நலன்கொண்டு மக்களைக் காக்கும் பண்புடையோரே அமைச்சராகப் பணியாற்ற வேண்டும் என்பதனை

       

        வன்கண் குடிகாத்தல் கற்றுஅறிதல் ஆள்வினையோடு

        ஐந்துடன் மாண்டது அமைச்சு (தி. 632)

        WITH THESE HE GUARDS PEOPLE BY HIS

        KNOWLEDGE FIRMNESS NAD MANLINESS

என்னும் திருக்குறள் உணர்த்தி நல் அமைச்சுக்கு வழிகாட்டியுள்ளதனைக் காணமுடிகிறது. அவ்வாறு சமூக நலன் கொண்டு வாழ்வோரால் மட்டுமே நல்ல நாட்டினை ; நல்ல உலகினைப் படைக்க இயலும் என்பதனைத் தெளிவுறுத்துகிறார் தெய்வப்புலவர்.

        பிணியின்மை செல்வம் விளைவுஇன்பம் ஏமம்

        அணிஎன்ப நாட்டிற்கு இவ்வைந்து (தி.738)

        RICH YIELD, DELIGHT, DEFENCE AND WEALTH

        ARE JEWELS OF LAND WITH BLOOMIN HEALTH

என்னும் திருக்குறள் உலக அமைதிக்கான நெறிகளை எடுத்துரைக்கிறது. நல்ல விளைச்சல் பிணியின்மையினையும் செல்வ வளத்தையும் இன்பத்தையும் பாதுகாப்பையும் அளித்து நாட்டின் பெருமைக்கு அணிசேர்க்கும் எனக் குறிப்பிட்டு அவ்வளத்தை உலகத்திற்கே பொதுமையாக்கினால் உலக அமைதி விளையும் என்பதனை உணர்த்தியுள்ளதனையும் அறிந்துகொள்ளமுடிகிறது.

கண்ணும் பார்வையும் (BENIGN LOOKS)

        ஒருவருடைய பார்வையே பண்பினை எடுத்துக்காட்டும் என்பது தமிழர் வழக்கு. அனைத்து உயிர்களையும் ஒருங்கே நோக்கும் கருணை கொண்ட பார்வையே உடனிருப்பை உறுதிசெய்யும் என்பதனைத் திருக்குறள் எடுத்துக்காட்டுகிறது.

        கண்ணோட்டம் இல்லவர் கண் இலர் கண் உடையார்

        கண்ணோட்டம் இன்மையும் இல் (தி. 577)

        UNGRACIOUS MEN LACK REAL EYES

        MEN OF REAL EYES SHOW BENIGN GRACE

என்னும் திருக்குறள் அனைத்து உயிர்களையும் ஒன்றாக நோக்கும் கண்ணுடையவரே கண்ணுடையார் என்றும் மற்றவர் கண்ணிருப்பினும் பார்வையற்றவராகவே கருதப்படுவர் என்றும் உணர்த்துகிறது. இதன்வழி சமூக நலனுக்காக உழைப்பவரின் அருமையினைத் திருக்குறள் எடுத்துக்காட்டி அவ்வாறு வாழ வழிகாட்டுகிறது.

வெருவந்த செய்யாமை (AVOIDING TERRORISM)

       

        எளிய மக்களை வலியோர் கொல்வதே கொடுமையான செயலாகக் குறிப்பிடப்படுகிறது. தனக்கு ஒன்றும் கிடைக்கவில்லையே என்பதற்காக அமைதியான மக்களை அழிப்பது கோழைத்தனமாகவே அமையும். ஆயுதம் இல்லாதவர்களை  ஆயுதங்களால் தாக்கும் கொடுமையினைத் தவிர்க்கவேண்டும் ; வளத்தைச் சீரழிக்காத தன்மையினைப் பரவலாக்க வேண்டும் என்பதனை வலியுறுத்துகிறார் திருவள்ளுவர்.

        கடிதோச்சி மெல்ல எறிக நெடிதுஆக்கம்

        நீங்காமை வேண்டு பவர் (தி. 562)

        WIELD FAST THE ROD OF BUT GENTLY LAY

        THIS STRICT MILDNESS PROLONGS THE SWAY

என்னும் திருக்குறள் உலக வன்முறையினை ஒழித்து அமைதிக்கான உடனிருப்பினை உறுதிசெய்வதாக அமைகிறது. மென்மையான வழியில் சென்றாலன்றி உலக அமைதியினைக் காண இயலாது என்பதனைத் தெளிவுறுத்துகிறார் தெய்வப்புலவர் திருவள்ளுவர்.

பெண்களுக்கான ஆற்றலுடைமை (WOMEN EMPOWERMENT)

        உலக அமைதியானது பெண்களுக்குரிய இடத்தினை  அளிக்காது நிறைவுறாது என்பதனைத் திருக்குறள் உணர்த்துகிறது. இதனை

       

        சிறைகாக்கும் காப்புஎவன் செய்யும் மகளிர்

        நிறைகாக்கும் காப்பே தலை (தி. 57)

        OF WHAT AVAIL ARE WATCH AND WARD?

        THEIR PURITY IS WOMEN’S GUARD

என்னும் திருக்குறள் எழிலுற உணர்த்தி நிற்கின்றது. அடக்கு முறை கொண்டு பெண்களை ஆளும் இழிநிலையால் எத்தகைய முன்னேற்றமும் அமையாது என்பதனையும் அவர்கள் தாங்களாகவே தங்கள் வாழ்வை அமைத்துக்கொள்ளும் பெருமையினாலேயே உடனிருப்புக்கான நிலை காக்கப்படும் என்பதனையும் உறுதிப்படுத்துகிறார் தெய்வப்புலர்.

       

ஒப்புரவு அறிதல் (DUTY TO SOCEITY)

        மனிதனானவன் தனித்து வாழும் நிலையற்றவன் என்பதனாலேயே சமூக விலங்கு (SOCIAL ANIMAL)  எனக் குறிப்பிடப்படுகிறான். அவ்வாறு பிறர் உழைப்பாலேயே பிறந்து, வளர்ந்து, இறக்கும் மனிதன் பிறரை அரவணைத்து வாழும் எண்ணம் கொண்டோராக வாழவேண்டுமென்பதனைத் திருவள்ளுவர் ஒப்புரவு அறிதலின் வழி உணர்த்துகிறார். உலகில் உள்ள பொருட்களை தன்னலத்துடன் உரிமை கொள்ளாது உழைத்தவர்க்கு உரியவகையில் கொடுத்து வாழவேண்டுமென்பதனை

       

        தாள் ஆற்றித் தந்த பொருள் எல்லாம் தக்கார்க்கு

        வேளாண்மை செய்தல் பொருட்டு (212)

        ALL THE WEALTH THAT TOILS GIVE

        IS MEANT TO SERVE THOSE WHO DESERVE

என்னும் திருக்குறளின் வழி உணர்த்துகிறார். ஒவ்வொரு நாட்டின் நிறையினையும் குறையினையும் உணர்ந்து தேவையானதைப் பெற்று தேவைப்படுவதனைக் கொடுத்து வாழ்ந்தால் நல்லிணக்கத்தோடு வாழமுடியும் என்பதனையும் அதனால் அமைதிக்கான உடனிருப்பினைப் போற்றிப் பாதுகாக்கமுடியும் என்பதனையும் தெளிவுறுத்துகிறார் திருவள்ளுவர்.    

 

நிறைவாக

        தெய்வப்புலவர் திருவள்ளுவர் அறம், பொருள், இன்பம் என அனைத்தையும் அறத்தையே அடிப்படையாகக் கொண்டு நெறிப்படுத்தியுள்ளதனை உணர்ந்துகொள்ளமுடிகிறது.

        எப்பணிக்கும் முதற்பணியாக விளங்கும் பணி குடிமைப்பணி. நன்றியுணர்வுடன் இப்பணியினை மேற்கொள்ளவேண்டும் எனத்திருக்குறள் அறிவுறுத்தியுள்ளதனைக் காணமுடிகிறது. பிறர் துன்புற தாம் மட்டும் வாழ்வது வாழ்வாகாது (NO SOCEITY CAN SURELY BE FLOURISHING AND HAPPY OF WHICH THE FAR GREATER PART OF THE MEMBERS ARE POOR AND MISERABLE – ADAM SMITH) என்னும் பொருளாதாரத் தந்தை ஆதாம் ஸ்மித் கூற்று திருக்குறளின் கருத்தினையே மொழிபெயர்த்திருப்பதனை உணர்ந்துகொள்ளமுடிகிறது.

        மக்களுக்குச் சேவை செய்வோரை தெய்வமானது தன் பணியினைச் செய்வதாக எண்ணி  துணைநிற்கும் என்பதனைத் தெளிவுறுத்துகிறார் தெய்வப்புலவர் திருவள்ளுவர்.

        உலகின் நலனுக்காக ; உலகின் பாதுகாப்பிற்காக ; உலகின் அமைதிக்காகப் பாடுபடவேண்டுமாயின் உலகத்தவர் அனைவரும் உடனிருப்புக்கான ஒப்புதலை உணர்ந்துகொள்ளவேண்டும் எனத் திருக்குறள் உணர்த்தி நிற்கிறது. மானுட மேன்மைக்குத் தனி மனித ஒழுக்கமும் சமூக ஒழுக்கமும் அடிப்படைக் குணங்களாக அமைதல் வேண்டும் எனத் திருக்குறளின்வழி திருவள்ளுவர் வலியுறுத்தியுள்ளதனை அறிந்துகொள்ளமுடிகிறது.

        குண நலன்களையும் சமூக நலன்களையும் முன்னிறுத்தும் திருக்குறள்களை ஆய்வதன் வழி அனைத்து மக்களின் நன்மையை ஒருங்கே நோக்கும் அற இலக்கியமாகத் திருக்குறள் படைக்கப்பட்டுள்ளதனை உணர்ந்துகொள்ளமுடிகிறது. எனவே திருக்குறள் அமைதி உடனிருப்பை வலியுறுத்தும் நூலாக ; காக்கும் நூலாக ; வளர்க்கும் நூலாக இயற்றப்பட்டுள்ளது எனத் தெளியமுடிகிறது. 

*************

(இராம. கனகசுப்புரத்தினம், பதினாறு கவனகர், திருக்குறள் உணர்வுரை, கவியோகி சுத்தானந்த பாரதியாரின் மொழிபெயர்ப்பு, கவனகர் முழக்கம், ஏழாம் பதிப்பு, 2015)

கல்வி அழியாத செல்வம்-Education is immortal wealth

 

கல்வியே அழியாச் செல்வம்

எத்தனை ஆண்டு தவம் செய்கிறோமோ அத்தனை சிறப்புடைய வரத்தைப் பெறமுடியும். இது கல்விக்கு மிகவும் பொருந்தும்.

குருவும் சீடனும்

உலகில் செல்வம் பலவுண்டு. அவற்றுள் சிறந்தது எது ? என்று சிந்தித்துப் பார்த்தேன். புரியவில்லை.  குருவிடம் கேட்டேன்

அவர் மீண்டும் அதே கேள்வியை என்னிடம் கேட்டார்.

சேர்த்து வைத்த செல்வம் தான் சிறந்தது எனக் கூறினேன்.

 ஆனால் அது வெள்ளம் வந்தால் அதனுடன் போய்விடுமே என்றார்.

பணம் பத்தும் செய்யுமாயிற்றே. அதுதான் சிறந்த செல்வம் எனக் கூறினேன்.

ஆனால் அது தீயில் எரிந்துவிடுமே என்றார்.

தங்கம், வைரம் இவைதான் சிறந்தவை எனக் கூறினேன்.

அரசன் நினைத்தால் மக்கள் பெற்றிருக்கும் நிலத்தையோ பொருளையோ கொள்ளமுடியுமே என்றார்.

அரிசி, பருப்பு போன்ற தானியங்கள் தான் சிறந்தவை எனக் கூறினேன்.

ஆனால் அவை கொடுக்கக்கொடுக்க குறைந்து விடுமே என்றார்.

வளமான நிலங்கள் தான் சிறந்தவை எனக் கூறினேன்.

ஆனால் அவற்றைப் பாதுகாக்கா விட்டால் வறண்டு போய்விடுமே என்றார்.

வெள்ளத்தால் போகாமல், தீயில் வேகாமல், வேந்தராலும் கொள்ளமுடியாத, கொடுத்தாலும் குறைவுபடாத, திருடர்களாலும் திருட முடியாத, காப்பதற்கும் எளிதாக இருப்பது எது எனக் கேட்டேன்.

கல்விச்செல்வமே சிறந்தது என்பதனை,

வெள்ளத்தால் போகாது

வெந்தணலால் வேகாது

வேந்தாராலும் கொள்ளத்தான் முடியாது

கொடுத்தாலும் நிறைவொழியக் குறைபடாது

கள்ளர்க்கோ மிக அரிது

காவலோ மிக எளிது

கல்வி என்னும் உள்ளத்தே பொருளிருக்க

உலகெலாம் பொருள்தேடி உழல்வதேனோ

என விடை கூறித் தெளிவுபடுத்தினார்.

ஆசிரியரும் மாணாக்கரும்

அழகில் சிறந்த அழகு எது? கூந்தல் அழகா, ஆடை அழகா ? , மஞ்சள் பூசிய முக அழகா? எனக் கேட்கிறார் ஆசிரியர்.  பெண்ணுக்கு நீண்ட கூந்தலும் ; வண்ண ஆடையும் ; மஞ்சள் பூசிய அழகும் அழகுதான் என்றாள் மாணவி. ஆனால் அதனை விட அழகு எது? எனக் கேட்கிறார் ஆசிரியர். தெரியவில்லையே? என மாணாக்கர் கூறினர்.

கல்வி தான் அழகு என்றார். ஏன்? எனக் கேட்டாள். இந்த அழகெல்லாம் நிலைபெறாது. கற்ற கல்வி அழகோ வாழ்நாள் முழுதும் அழகுதரும். அழகு மட்டுமல்ல பெருமையும் கல்வியால் தான் விளையும் என்றார் ஆசிரியர். எப்படி? எனக் கேட்டால் மாணவி. ஏனென்றால், கூந்தல் இயற்கையாகவே வளர்வது. அதற்காக மரபணுக்களைத் தான் பாராட்டமுடியும். ஆடை அழகு என்றால் அந்த ஆடையை தயாரித்தவரைத்தான் பாராட்டமுடியும். மஞ்சள் பூசிய முக அழகே அழகு என்றால் மஞ்சலை பூசக்கற்றுக்கொடுத்த தாயாரையே பாராட்டமுடியும். ஆனால் கற்றதால் பெற்ற அழகிற்காக மற்ற எவரையும் பாராட்டுவதில்லை, ஆசிரியர், பெற்றோர் எனப் பலர் பின்னால் இருந்தாலும் கற்ற முயற்சிக்காக கற்றவரே பாராட்டப்படுகிறார். எனவே கல்வி அழகே சிறந்தது என்கிறது ஓர் இலக்கியம். மாணாக்கர்களும் கல்வி அறிவை உணர்ந்துகொள்கின்றனர்.

கல்லாதோர் பெருமை

எத்தனையோ இலக்கியங்கள் கல்வி குறித்த பெருமையை உணர்த்திநிற்கின்றன. பாதிரி மலர் அத்தனைச் சிறப்புடையதாக அமையாவிட்டாலும் நீரில் சேர்ந்தபின் மணம் வீசுகிறது. அது போல கல்லாதவர்கள் கற்றவர்களுடன் சேரும்போது பெருமையடைகின்றனர் என்கிறது ஓர் இலக்கியம்.

கற்றோர் பெருமை

கற்றவர்களை செல்வந்தர்கள் அடக்கிவிடமுடியும் என நினைப்பது தவறு. அப்படி எண்ணுவது தாமரைத் தண்டினால் யானையைக் கட்டிவிடமுடியும் என நினைப்பது போன்றது என்கிறது ஓர் இலக்கியம்.

        பெருமை சேர்க்கும் கல்வி கற்போம்             கற்ற கல்வி சிறக்க நிற்போம்.